ಕೆ.ಎಸ್.ಧನಂಜಯ
ಸಾಮಾನ್ಯವಾಗಿ ಭಾರತೀಯ ಚಿತ್ರರಂಗದಲ್ಲಿ ಮಹಿಳೆಯರನ್ನು ಸಂಕಷ್ಟಕ್ಕೆ ಸಿಲುಕುವ, ಪುರುಷರ ನೆರವಿಗಾಗಿ ಕಾಯುವ ಪಾತ್ರಗಳಲ್ಲಿ ಚಿತ್ರಿಸುವ ಪರಂಪರೆ ಕಂಡುಬರುತ್ತದೆ. ಆದರೆ ‘ಥುಡಕ್ಕಂ’ನಲ್ಲಿ ನಾಯಕಿಯೇ ತನ್ನ ಹೋರಾಟದ ಕೇಂದ್ರವಾಗಿರುವುದು
ಮಹಿಳಾ ಸಬಲೀಕರಣದ ದೃಷ್ಟಿಯಿಂದ ಸ್ವಾಗತಾರ್ಹ. ವಿಸ್ಮಯಾ ಮೋಹನ್‌ ಲಾಲ್ ಅವರ ಸಾಹಸ ದೃಶ್ಯಗಳು
ಗಮನ ಸೆಳೆಯುತ್ತವೆ. ಭಾವನಾತ್ಮಕ ಅಭಿನಯದಲ್ಲಿ ಇನ್ನಷ್ಟು ಪಕ್ವತೆ ಸಾಧಿಸಬೇಕಾದ ಅವಕಾಶಗಳಿದ್ದರೂ, ಮೊದಲ ಚಿತ್ರದಲ್ಲಿಯೇ ಅವರು
ತೋರಿಸಿರುವ ಧೈರ್ಯ ಮತ್ತು ದೈಹಿಕ ಚುರುಕುತನ ಪ್ರಶಂಸನೀಯ.
ಆತ್ಮರಕ್ಷಣೆಯೇ ಸಬಲೀಕರಣದ ಸಂಪೂರ್ಣ ರೂಪವಲ್ಲ! ಚಿತ್ರವನ್ನು
ವಿಮರ್ಶಾತ್ಮಕವಾಗಿ ನೋಡಬೇಕಾದ ಪ್ರಮುಖ ಅಂಶವೆಂದರೆ, ಮಹಿಳೆಯೊಬ್ಬಳು
ತನ್ನನ್ನು ತಾನು ರಕ್ಷಿಸಿಕೊಳ್ಳಲು ಕಲಿಯುವುದು
ಅತ್ಯಂತ ಅಗತ್ಯ. ಆದರೆ ಮಹಿಳಾ ಸಬಲೀಕರಣದ
ಸಂಪೂರ್ಣ ಅರ್ಥ ಆತ್ಮರಕ್ಷಣೆಯಲ್ಲಿಯೇ ಮುಗಿಯುವುದಿಲ್ಲ. ಮಹಿಳೆಯರು
ರಾತ್ರಿ ನಿರ್ಭಯವಾಗಿ ಸಂಚರಿಸುವಂತಾಗಬೇಕು. ಅವರ ಶಿಕ್ಷಣ, ಉದ್ಯೋಗ,
ಅಭಿವ್ಯಕ್ತಿ ಮತ್ತು ವೈಯಕ್ತಿಕ ಸ್ವಾತಂತ್ರ್ಯಕ್ಕೆ ಸಮಾಜ ಗೌರವ ನೀಡಬೇಕು.
ಮಹಿಳೆಯರ ಮೇಲೆ ನಡೆಯುವ ಹಿಂಸೆಗೆ
ಮಹಿಳೆಯರೇ ತಮ್ಮ ರಕ್ಷಣೆಯ ಹೊಣೆ
ಹೊರುವಂತಾಗಬಾರದು ಹಿಂಸೆಯನ್ನು
ತಡೆಯುವ ಜವಾಬ್ದಾರಿ ಸಮಾಜ, ಕಾನೂನು ಮತ್ತು ಆಡಳಿತ ವ್ಯವಸ್ಥೆಗಳ ಮೇಲೆಯೂ ಇದೆ. ಈ ದೃಷ್ಟಿಯಿಂದ
ಚಿತ್ರವು ಮಹಿಳೆಯರ ಸುರಕ್ಷತೆಯ ಪ್ರಶ್ನೆಯನ್ನು ಮುಂದಿಡುತ್ತದೆ. ಆದರೆ ಮಹಿಳೆಯರ ಸಬಲೀಕರಣವನ್ನು
ಕೇವಲ ದೈಹಿಕ ಶಕ್ತಿಯ ಮೂಲಕ ಪರಿಹರಿಸುವ ಪ್ರಯತ್ನ
ಅದರ ಚಿಂತನೆಯ ಮಿತಿಯೂ ಆಗಿದೆ. ಮಹಿಳೆಯರ ಬದುಕಿನ ಸ್ವಾತಂತ್ರ್ಯ ಮತ್ತು ಸುರಕ್ಷತೆಯ ಕುರಿತು ಇನ್ನಷ್ಟು ಆಳವಾದ ಸಾಮಾಜಿಕ ಚರ್ಚೆಗೆ ಚಿತ್ರ ಅವಕಾಶ ನೀಡಬಹುದಿತ್ತು.
ತಂದೆಯ ನೆರಳಿನಿಂದ ಸ್ವಂತ ವ್ಯಕ್ತಿತ್ವದ ಕಡೆಗೆ ಪ್ರಯಾಣಿಸುವ ಮೋಹನ್‌ಲಾಲ್ ಅವರ ಪುತ್ರಿ ಎಂಬ ಗುರುತಿನೊಂದಿಗೆ ಚಿತ್ರರಂಗ ಪ್ರವೇಶಿಸಿರುವ ವಿಸ್ಮಯಾ ಅವರಿಗೆ ಸಹಜವಾಗಿಯೇ ಹೆಚ್ಚಿನ ನಿರೀಕ್ಷೆಗಳಿವೆ.ಆದರೆ ಕಲಾವಿದೆಯೊಬ್ಬಳ ನಿಜವಾದ ಸಾಧನೆ ಆಕೆಯ ಕುಟುಂಬದ ಖ್ಯಾತಿಯಿಂದಲ್ಲ ತನ್ನ ಪ್ರತಿಭೆ, ಪರಿಶ್ರಮ ಮತ್ತು ಸ್ವಂತ ವ್ಯಕ್ತಿತ್ವದಿಂದ ಗುರುತಿಸಿಕೊಳ್ಳುವುದರಲ್ಲಿ ಇದೆ. ‘ಥುಡಕ್ಕಂ’ನಲ್ಲಿ ವಿಸ್ಮಯಾ ತಮ್ಮ ತಂದೆಯ ಪ್ರಸಿದ್ಧಿಯ ನೆರಳಿನಿಂದ ಹೊರಬಂದು, ಸ್ವತಂತ್ರ ಕಲಾವಿದೆಯಾಗಿ ಗುರುತಿಸಿಕೊಳ್ಳುವ ಮೊದಲ ಹೆಜ್ಜೆ ಇಟ್ಟಿದ್ದಾರೆ. ಈ ಪ್ರಯಾಣದಲ್ಲಿ ಅವರು ಇನ್ನಷ್ಟು ವಿಭಿನ್ನ ಪಾತ್ರಗಳನ್ನು ಆಯ್ಕೆ ಮಾಡಿಕೊಂಡು ತಮ್ಮ ಅಭಿನಯದ ವ್ಯಾಪ್ತಿಯನ್ನು ವಿಸ್ತರಿಸಿಕೊಳ್ಳುವ ನಿರೀಕ್ಷೆಯಿದೆ.
ಒಂದು ಸಣ್ಣ ತಿರುಳಾದರೂ ಅದನ್ನು ತೆಗೆದುಕೊಂಡು ಹೋಗುವ ರೀತಿ ಇಷ್ಟವಾಗುತ್ತೆ, ಚಿತ್ರದ ನಾಯಕಿ, ಆಕೆಯ ಆರೋಗ್ಯ ಇಲ್ಲದ ತಂದೆ, ಒಂದು ಲ್ಯಾಬ್‌ ನಾಯಿ ಒಬ್ಬ ವಿಲನ್‌ ಮತ್ತು ಒಂದು ಪೊಲೀಸ್‌ ತಂಡ ಸುತ್ತ ಹೆಣೆದ ಕಥೆ ಸಂಪೂರ್ಣ ರಾತ್ರಿಯಲ್ಲೆ ನಡೆಯುತ್ತದೆ ‘ಥುಡಕ್ಕಂ’ ಕೇವಲ ಸಾಹಸಮಯ ಚಿತ್ರವಲ್ಲ; ಮಹಿಳೆಯ ಧೈರ್ಯ, ಆತ್ಮವಿಶ್ವಾಸ ಮತ್ತು ಬದುಕಿನ ಹೋರಾಟದ ಕುರಿತು ಚಿಂತನೆಗೆ ಆಹ್ವಾನ ನೀಡುವ ಪ್ರಯತ್ನ.ಚಿತ್ರದ ಕಥೆಯಲ್ಲಿ ಕೆಲವು ಪರಿಚಿತ ತಿರುವುಗಳು ಮತ್ತು ಮಹಿಳಾ ಸಬಲೀಕರಣದ ಕುರಿತು ಇನ್ನಷ್ಟು ಆಳವಾಗಿ ಹೇಳಬಹುದಾದ ಅಂಶಗಳಿದ್ದರೂ, ವಿಸ್ಮಯಾ ಮೋಹನ್‌ಲಾಲ್ ಅವರ ಅಭಿನಯದ ಆರಂಭಿಕ ಹೆಜ್ಜೆ ಗಮನಾರ್ಹವಾಗಿದೆ. ಮಹಿಳೆಯನ್ನು ಸಬಲಗೊಳಿಸುವುದು ಎಂದರೆ ಆಕೆಗೆ ಹೋರಾಡುವುದನ್ನು ಮಾತ್ರ ಕಲಿಸುವುದಲ್ಲ ಬದಲಾಗಿ ಹೋರಾಡಬೇಕಾದ ಅನಿವಾರ್ಯತೆ ಇಲ್ಲದ ಸಮಾಜವನ್ನು ನಿರ್ಮಿಸುವುದೂ ಕೂಡ ಹೌದು. ಒಬ್ಬ ಮಹಿಳೆ ತನ್ನನ್ನು ತಾನು ರಕ್ಷಿಸಿಕೊಳ್ಳುವಷ್ಟು ಶಕ್ತಿಶಾಲಿಯಾಗಿರಬೇಕು ಅದೇ ಸಮಯದಲ್ಲಿ ಆಕೆ ಯಾವುದೇ ಭಯವಿಲ್ಲದೆ ಬದುಕುವಷ್ಟು ಸುರಕ್ಷಿತವಾಗಿರಬೇಕು. ‘ಥುಡಕ್ಕಂ’ ಈ ಚಿಂತನೆಯತ್ತ ಸಾಗುವ ಒಂದು ಆರಂಭಿಕ ಹೆಜ್ಜೆ. ಮಹಿಳೆಯ ಬದುಕಿನ ಸ್ವಾತಂತ್ರ್ಯ, ಗೌರವ ಮತ್ತು ಸಮಾನತೆಯ ಕುರಿತು ಸಮಾಜ ಮತ್ತಷ್ಟು ಗಂಭೀರವಾಗಿ ಆಲೋಚಿಸುವಂತೆ ಮಾಡುವುದೇ ಈ ಚಿತ್ರದ ನಿಜವಾದ ಸಾರ್ಥಕತೆ. ಮಹಿಳೆಯ ಧೈರ್ಯಕ್ಕೆ ಚಪ್ಪಾಳೆ ಹೊಡೆಯುವುದಷ್ಟೇ ಅಲ್ಲ, ಆ ಧೈರ್ಯವನ್ನು ಪ್ರತಿದಿನ ಪರೀಕ್ಷಿಸುವ ಸಮಾಜದ ಮನಸ್ಥಿತಿಯೂ ಬದಲಾಗಬೇಕು.
